上海話童謠兒歌

2024年3月7日發(作者：螳螂的樣子)

1接口令

儂姓啥？我姓黃。啥個黃？草頭黃。啥個草？青草。啥個青？碧綠青。啥個碧？毛筆。啥

個毛？三毛。啥個山？高山。啥個高？年糕。啥個年？2012年。

2哭燭包

一歇哭，一歇笑，兩只眼睛開大炮，一開開到城隍廟，城隍老爺哈哈笑。

賴學精

賴學精，白相精，書包摜辣屋頭頂，看見先生難為情

從前有個老伯伯

從前有個老伯伯，年紀活到八十八，有一日八月八號，早浪八點鐘，乘了八路電車，乘到八仙橋，吃碗八寶飯，銅鈿用脫八塊八角八。

敲鈴彈琴

小玲會彈琴，小琴會敲鈴，小玲要敲小琴個鈴，小琴要彈小玲個琴；小琴教小玲敲鈴，小玲教小琴彈琴。

小花狗

一張小花狗，眼睛骨溜溜，坐辣門口頭，想吃肉骨頭。

抬轎子

哩啊哩吱轎子，轎啊轎子哩吱。抬轎子，抬轎子，一抬抬到城隍廟，“扒拉搭”，跌一跤，拾著一只大元寶。

小姑娘

拉拉小辮子，點點小鼻頭，拉拉小耳朵，翹翹小嘴巴，花花癢氣氣。

喔唷哇

喔唷哇！做啥啦？蚊子咬我呀！快點上來呀！上來做啥呀？上來白相呀！

敲洋釘

長腳鷺鷥敲洋釘，敲來敲去敲勿進，原來是只螺絲釘。

一只狗

一只狗，兩只頭，三鈿買來個，四川帶來個，五顏六色個，七嘴八搭個，究竟哪能個，實在嘸沒個。

蜜蜂叮癩痢

蜜蜂叮癩痢，癩痢背洋槍，洋槍打老虎，老虎吃小人，小人捉雄雞，雄雞吃蜜蜂。

兩只老虎

兩只老虎，兩只老虎，跑得快，跑得快，一只嘸沒尾巴，一只嘸沒耳朵，真奇怪，真奇怪！

排排坐

排排坐，吃果果，幼兒園里朋友多，朋友多，好唱歌。

新剃頭

新剃頭，打三記，勿打三記觸霉頭，打仔三記額角頭。

小老蟲偷油

小老蟲，上燈臺，偷油吃，下勿來，咯碌咯碌滾下來。

踢毽子歌

一手心，二手背，三酒盅，四牙筷，五頂拳，六佛手，七杠子，八大跳，九上面，十上背。

搖啊搖

搖啊搖，搖到外婆橋，外婆叫我好寶寶。糖一包，果一包，外婆買條魚來燒。頭勿熟，尾巴焦，盛辣碗里吱吱叫，吃辣肚里豁虎跳。跳啊跳，一跳跳到賣魚橋，寶寶樂得哈哈笑。

搖啊搖，搖到外婆橋，外婆叫我好寶寶。請吃糖，請吃糕，糖啊糕啊莫吃飽。少吃滋味多，多吃滋味少。

搖啊搖，搖到外婆橋，外婆叫我好寶寶，我叫外婆洋泡泡，外婆罵我小出老！

“小丫頭”歌

小丫頭，勿成器，勿會做生活，看看真討氣。叫伊淘淘米，撳脫仔飯籮底；叫伊挽挽水，駁起屁股摸螺螄；叫伊拔拔蔥，登拉田里豎煙囪；叫伊紡紡紗，錠子頭上開朵花；叫伊繡繡鞋，好像雞腳賴；叫伊織織布，布機潭里撤堆污；叫伊兜兜火，東家白話西家坐；叫伊捉捉花，偷仔隔壁田里瓜。

梁山頭浪一只羊（自擬題目）

梁山頭浪一只羊，遠往松江糶米糧。大斗量來小斗賣，升籮頭浪養爹娘。爹娘養我能長大，我養爹娘勿久長

騎馬到松江（自擬題目）

啷啷啷,騎馬到松江。松江老虎叫，囡囡心里別別跳。

賣豬玀（自擬題目）

背背馱,賣豬玀,開年賣脫儂! “賣脫儂，肯?”“勿肯個!”

一籮麥兩籮麥（自擬題目）

一籮麥,兩籮麥,三籮開手拍大麥,劈劈拍,劈劈拍。

木頭人（其一）（自擬題目）

三、三、三，山上有個木頭人，不許講話不許動！（看啥人動，動了就要接下去講）

本來要打千千萬萬記，現在辰光來不及，馬馬虎虎打十記。一、二、三、四、五，六、七、八、九、十。 打了十記還不夠，還要打三記。一、二、三。

木頭人（其二）（自擬題目）

三三三，阿拉儕是木頭人，勿許哭來勿許笑，還有一個勿許動。

篤篤篤 賣糖粥 （自擬題目）

篤篤篤，賣糖粥，三斤蒲桃四斤殼。吃儂個肉，還儂殼。張家老伯伯辣辣??？辣辣海。問

儂討只小花狗。儂來揀一只。汪、汪、汪！

小皮球（自擬題目）

小皮球,小小籃,落地開花二十一,二五六,二五七,二八二九三十一;三五六,三五七,三八三九四十一;……

落雨嘍（自擬題目）

落雨嘍,打烊嘍,小八臘子開會嘍!

稀奇勿煞

希奇勿煞,賣樣勿煞,爛泥菩薩,一腳踢殺!

搭頭歌

大頭大頭,下雨勿愁,人家有傘,我有大頭。

老面皮

冬瓜皮，西瓜皮，小姑娘赤膊老面皮！

月亮亮

月亮亮,家家小囡出來白相相，拾著一只釘，打管槍，戳殺老鴉爛肚腸。

小老蟲

小老蟲，上燈臺，偷油吃，下勿來，骨落骨落滾下來。

金鎖銀鎖（其一）

金鎖銀鎖，軋辣辣辣一鎖。麻荔子開花，鎖到啥人算數。

金鎖銀鎖（其二）

金鎖銀鎖，咯嘞嘞嘞一鎖；花轎子抬過，馬蘭頭挑過，軋著啥人算數。

我們要揀一個人（上海普通話歌）

我們要揀一個人，我們要揀一個人！你們要揀什么人？你們要揀什么人？我們要揀朱××，我們要揀朱××！什么人來拖得去，什么人來拖得去？王××來拖得去，王××來拖得去。

山浪有只廟

山浪有只廟，廟里有只缸，缸里有只碗，碗里有只蛋，蛋里有個小和尚，嗯牙嗯牙要吃綠豆湯。

山浪有只老虎（自擬題目）

山浪有只老虎，老虎要吃人，拿伊關辣籠子里。籠子壞脫，老虎逃脫，逃到南京，逃到北京，買包糖精，擺辣水里浸一浸，嘧唏嘧唏拉胡琴。

從前有只廟（自擬題目）

從；前有只廟，廟里有棵樹，樹下有個老和尚，老和尚對小和尚講故事：從前有只廟，……

從前有座山（自擬題目）

從前有座山，叫黃昆山；山浪有條路，叫嘰哩咕嚕；路邊有只廟，叫莫名其妙；廟里有只缸，叫四大金剛；身浪有把劍，叫看勿見；來了兩個官，一個叫筆套管，一個叫痰盂罐；……

小弟弟小妹妹跑開點（自擬題目）

小弟弟小妹妹跑開點，敲碎玻璃老價鈿，問?姆媽去討兩鈿，討著銅鈿賠玻璃。

1、2、3（自擬題目）

1、2、3，就是你，1、2、6，就是他，1、2、3、7、6，就是你和他。

弟弟疲倦了（自擬題目）

弟弟疲倦了，眼睛小；眼睛小，要?覺。媽媽坐辣搖籃邊，把搖籃搖。盎盎我個小寶寶，安安穩穩?一覺。今天?得好，明朝起得早，花園里去采葡萄。

正月里來踢毽子（自擬題目）

正月里來踢毽子，二月里來放鷂子，三月里向薺菜子，四月里向落花子，五月端午裹粽子，六月里向拍蚊子，七月棉花結鈴子，八月里向吐瓜子，九月里收葵花子，十月里向造房子，十一月里切栗子，十二月里養個小兒子。

雞雞斗（其一）（自擬題目）

雞雞斗，共共飛，飛到高山吃白米。

雞雞斗（其二）（自擬題目）

雞雞斗，蓬蓬飛，飛到娘舅背后底。娘舅話啦殺脫伊，舅媽話拉留拉去。留到開年孵小雞，小雞蹲拉青草里。割脫青草種米莧，吃仔米莧上西天。

捉蜻蜓

天靈靈，地靈靈，茅草窠里捉蜻蜓。

大蜻蜓

大蜻蜓，綠眼睛，兩只眼睛亮晶晶，飛一飛，停一停，飛來飛去捉蒼蠅。

湯司令到

湯司令到， 機關槍掃， 熱水瓶爆，癩蛤巴跳。

小星星

小星星，亮晶晶，青石板浪釘銅釘。小星星，亮晶晶，伊拉對儂眨眼睛。

金鉤鉤 銀鉤鉤

金鉤鉤，銀鉤鉤，囡囡寶寶拉鉤鉤。請儂伸出小指頭，鉤啊鉤啊鉤三鉤。

淘米燒夜飯

淘米燒夜飯，燒好夜飯吃夜飯，吃好夜飯乘風涼，乘好風涼想一想，明朝起來買點啥？青菜蘿卜大頭菜。

坐下去，立起來

坐下去，立起來。電燈開開來，鈔票摸出來，搓搓小麻將呀，來來白相相呀，輸脫鈔票乒令乓冷打相打呀。

嘀答嘀答灑水車

大街浪，真鬧猛，卡車電車來回跑。嘟嘟嘟嘟大汽車，嘀鈴嘀鈴自行車。撲撲撲撲摩托車，嘀答嘀答灑水車。

拉鋸

拉鋸！拉鋸！外婆屋里唱大戲。接姑娘，請女婿，小外孫，也要去。吃個啥個飯？吃個大公雞。咬一口，好新奇，從來嘸沒吃過搿能個好東西。

小螺螄

小螺螄，真可笑，造房子，勿用腦。前門造得圓又大，后門造得尖又小。自己想想難為情，見人就拿門關牢。

螳螂新做親

螳螂新做親，洋辣做媒人，大頭蛤蜢拎仔裙，小頭蛤蜢做贊禮。螢火蟲，掮燭燈，蚊子吹打小伶伶，跟屁蟲吃醉老酒滾?滾。

六兄弟

兄弟六個本同娘，相貌身材不一樣；老大眼淚汪汪（雨）；老二素衣白裳（雪）；老三無影無蹤（風）；老四骨頭石硬（雹）；老五打鼓出場（雷）；老六渾身閃光（閃電）。

花雞娘子出嫁

花雞娘子真正俏，嫁給東家熊老老。狐先生，做媒人。黃鼠狼，抬花轎。狗奏音樂貓放炮，銅鑼喇叭多熱鬧。小白兔兒聽見了，躲辣門口呵呵笑。

稱呼

上海閑話真有趣，稱呼搭人家勿一樣。寶寶個媽媽叫姆媽，姆媽個姆媽叫外婆，姆媽個阿爸叫外公。寶寶個爸爸叫爹爹，爹爹個爹爹叫老爹，爹爹個姆媽叫唔奶。上海閑話真有趣，稱呼搭人家勿一樣。

小三子

小三子，拉車子，一拉拉到陸家嘴。拾著一包香瓜子，炒炒一鍋子，吃吃一肚子，拆拆一褲子，到黃浦江邊?褲子，撥拉紅頭阿三看見仔，拖到巡捕房里罰角子。

有趣個菜名

阿拉儕是上海人，上海閑話真好聽。菜場里向兜一圈，各種菜名講得清。白菜叫作黃芽菜，玉米叫作珍珠米。萵苣叫作香烏筍，土豆叫作洋山芋。西紅柿，叫番茄，茄子茄子叫落蘇，還有交關好小菜，大家儕來尋一尋。

雞冠花 蓬蓬開

雞冠花，蓬蓬開，老鷹吃酒還勿來。雙羊燈，梅花燈，照仔老鷹回家門。泥鰍討老人，黃鱔勿相信。蛤蜢去打聽，長腳黃蜂掛紅燈。紅頭蒼蠅吹喇叭，田雞拉車搬桌凳。喜酒擺辣田頭埂，吃到半夜再散盡。

天上星

天上星，地上星，爺爺叫我吃點心。勿高興，買糕餅，糕餅甜，買斤鹽，鹽末咸，買只籃，籃末漏，買升豆，豆末香，買塊姜，姜末辣，買只鴨，鴨末叫，買只鳥，鳥末飛，買只雞，雞末喔喔啼，買只槧光梨。

啥個彎彎

姐姐妹妹，坐在門邊，唱起歌來，天邊水邊。啥個彎彎辣天邊？啥個彎彎辣眼前？啥個彎彎頭上過？啥個彎彎辣水邊？月亮彎彎辣天邊，眉毛彎彎辣眼前，木梳彎彎頭上過，小船彎彎辣水邊。

康鈴康鈴馬來哉

康鈴康鈴馬來哉，隔壁大姐轉來哉。啥個小菜？茭白炒蝦，田雞踏殺。 老鴉告狀，告撥文王； 文王賣布，賣著姐夫；姐夫關門，關著蒼蠅；蒼蠅扒灰，扒著烏龜，烏龜拆屁，拆得滿地。

正月里來踢毽子

正月里來踢毽子，二月里來放鷂子，三月里向薺菜子，四月里向落花子，五月端午裹粽子，六月里向拍蚊子，七月棉花結鈴子，八月里向吐瓜子，九月里收葵花子，十月里向造房子，十一月里切栗子，十二月里養個小兒

子。

七字歌

地浪七塊冰，臺浪七盞燈，墻浪七只釘，樹浪七只鷹，天浪七粒星。乒——乓，踏碎地浪七塊冰，撲——撲，吹滅臺浪七盞燈，吭——嗨，拔去墻浪七只釘，呵——噓，趕走樹浪七只鷹，一朵烏云遮沒天浪七粒星。連念七遍就聰明。

繞口令

白廟白貓

山上有座白廟，地上有只白貓，白發老公公落脫一頂白帽，白貓銜了白帽逃進了白廟。

墻上掛面鼓

墻上掛面鼓，鼓上畫老虎。老虎踏破鼓，買塊布來補。到底是布補鼓，還是布補虎。

敲鈴彈琴

小玲會彈琴，小琴會敲鈴。小玲要敲小琴個鈴，小琴要彈小玲個琴；小琴教小玲敲鈴，小玲教小琴彈琴。

墻與羊

張家打堵墻，楊家養只羊。楊家個羊撞倒張家一堵墻，張家個墻壓殺楊家一只羊。楊家要張家賠羊，張家要楊家賠墻。到底是楊家個羊撞倒張家個墻，還是張家個墻壓殺楊家個羊？

和尚偷醬缸

月亮白茫茫，有人偷醬缸，聾彭親聽得，瞎子看清爽，啞嘴高聲喊，蹺腳追得忙，壞手去抓發，瘌痢反心傷，瞇細先看出，原來是和尚。

廟里貓廟外貓

廟里一只貓，廟外一只貓。廟里貓要咬廟外貓，廟外貓要咬廟里貓。到底是廟里貓咬了廟外貓，還是廟外貓咬了廟里貓。

墻浪有面破鑼

墻浪有面破鑼，臺浪有只破鍋，床浪有條破褲，包里有塊破布。破布補破褲，破鑼套破鍋，賣脫破布破褲換破土布，賣脫破鍋破鑼調火爐。

天浪七只星

天浪七只星，地浪七塊冰，樹浪七只鶯，梁浪七只釘，臺浪七盞燈。星冰鶯釘燈，燈釘鶯冰星，呼盧呼盧扇因燈，噯嗄噯嗄拔去釘，哦噓哦噓趕走鶯，飛過烏云蓋脫星，抽起一腳踢碎冰。念是七遍就聰明。

上海有座龍華塔

上海有座龍華塔，麻雀飛過擦一擦。阿甲問阿達：‘是雀擦塔，還是塔擦雀？’阿達答阿甲：‘迭個是雀擦塔，勿是塔擦雀’。

吃橘子，剝橘殼

吃橘子，剝橘殼，橘殼?拉北壁角。到底是橘殼碰壁角，還是壁角碰橘殼。

老伯伯拔麥

一個老伯伯，腳浪著雙白襪，到田里向去拔麥。為仔拔麥，弄齷齪腳浪雙白襪。拍一拍腳浪雙白襪，掮起田里向拔個麥，到了房間里向，肩胛浪放下拔個麥，腳浪脫下弄齷齪個白襪，馬上?白襪。又要?白襪，又要擺拔麥，又要曬拔麥；又要曬拔麥，又要?白襪，又要曬白襪。為來為去到田里去拔麥，弄齷齪腳浪向搿雙白襪！

小熱昏

說起來個希奇，啥個事體？上海個地方，大來個邪氣。徐家匯朝南，龍華寶塔有名氣。昨日夜里，出仔個事體，搿里個寶塔，撥賊骨頭偷去。正巧撥拉，瞎子里個看見，啞子喊捉賊，撥聾子聽見，撥瘋癱人捉牢，算伊晦氣。捉牢仔個小賊，嘸啥客氣，拿伊送到，郵政局里。